Respublikaçılar Partiyasından prezidentliyə namizəd Donald Tramp noyabrın 5-də keçiriləcək seçkilərdə qalib gəlsə, məşhur milyarder İlon Maska hansı vəzifəni verəcəyini açıqlayıb. Modern.az xəbər verir ki, “Reuters”in məlumatına görə, Tramp hökumətin səmərəliliyini artırmaq üçün komissiya yaradacağını deyib. Məlumata görə, eks-prezident artıq bir neçə həftədir ki, öz köməkçiləri ilə hökumətin səmərəliliyini artırmaq üçün komissiya yaratmaq ideyasını müzakirə edir.
Dünən Nyu-York İqtisadi Klubunda çıxış edən Donald Tramp ilk dəfə bu ideyanı açıq şəkildə dəstəkləyib. Tramp həmçinin ilk dəfə Maskın bu quruma rəhbərlik etməyə razılaşdığını bildirib.
“Mən hökumətin effektivliyi üzrə komissiya yaradacağam, ona bütün federal hökumətin tam maliyyə və fəaliyyət göstəricilərini nəzərdən keçirmək və köklü islahatları tövsiyə etmək tapşırılacaq”, - Tramp deyib.
19 avqust tarixli podkastda Mask ABŞ-ın keçmiş prezidenti ilə bu məsələ ilə bağlı danışdığını və bu komissiyada işləməkdə maraqlı olacağını bildirib.
“Fürsət yaranarsa, mən Amerikaya xidmət etməyi səbirsizliklə gözləyirəm” – deyə Mask öz mikrobloqunda yazıb.