"Bloomberg" nəşri Türkiyənin BRICS-ə qoşulmaq üçün müraciət etdiyini yazıb. Nəşrin mənbələrinin iddiasına görə, Ankara BRICS üzvlüyünə Rusiya və Çinlə iqtisadi əməkdaşlığı gücləndirmək və Asiya ilə Avropa arasında enerji əməkdaşlığında potensialını inkişaf etdirmək imkanı kimi baxır.
Kremlin mətbuat katibi Dmitri Peskov bildirib ki, Türkiyə BRİCS-ə daxil olmağa maraq göstərir, bunu çoxdan elan ediblər. Rusiya Prezideninin köməkçisi Yuri Uşakov isə deyib ki, Türkiyə Prezidenti Rəcəb Tayyib Ərdoğan Rusiyanın Kazanda keçiriləcək BRİCS sammitində iştirak dəvətini qəbul edib. Lakin Ankaradan hələlik rəsmi açıqlama verilməyib.
Qeyd edək ki, Türkiyənin BRİCS-ə qoşulmaq istəyi barədə xəbərlər Azərbaycanın bu təşkilata üzv olmaq üçün müraciət etməsindən sonra yayılıb.
Məsələ ilə bağlı Modern.az-a danışan Türkiyə Böyük Millət Məclisinin (TBMM) hakim Ədalət və İnkişaf Partiyasından olan deputatı Şamil Ayrım bildirib ki, Türkiyə regionda tarazlığı qoruyur:
"Türkiyə ölkələrlə sülh, əmin-amanlıq içində yaşamaq istəyir. Gələcəkdə hər şey ola bilər. Dünyada müxtəlif qruplar var. Bunlar əsasən iqtisadi qruplardır. Türkiyə bu qrupların bir çoxunun içində var. Önümüzdəki dövrlərdə BRİCS-ə də qoşula bilərik. Amma hazırda Türkiyənin öz daxilində terrora qarşı ciddi mübarizəsi var. Digər yandan iqtisadiyyatla bağlı vacib irəliləyişlər olur. Türkiyə Cənubi Qafqazda Azərbaycanın yanındadır. Azərbaycanın bölgədə stabillik adası olduğunu hamı bilir. Türkiyə bu gün də, sabah da Azərbaycanın yanında olacağını elan edib".
Şamil Ayrım əlavə edib ki, Türkiyənin qoşulduğu birliklərin heç biri Azərbaycanı narahat edəcək təşkilatlar olmaz, bunu hamı bilməlidir.
"Türkiyə gələcəkdə BRİCS daxil olmaqla, müxtəlif digər təşkilatlara da qoşula bilər. Xarici işlər nazirimiz bütün dünyanı gəzir. Türkiyənin bütün sahələrdə olan potensial və imkanlarını anlatmağa çalışırıq. Türkiyə böyük Atatürkün ifadəsi ilə “yurdda sülh, dünyada sülh" anlayışını əsas götürür. Prezidentimizin “dünya 5-dən böyükdür” konsepsiyası əsasında davranırıq. Yəni beynəlxalq arenadakı qeyri-obyektiv, qərəzli addımlara son dərəcə qarşıyıq. Türkiyənin bunun üçün daha güclü olmağı vacibdir. Güclü Türkiyə və Azərbaycan türk dünyasında nələr etməz. Ona görə yekdilliklə "yaşasın Türkiyə, yaşasın Azərbaycan" deyirik. Digər türk dövlətləri də Azərbaycan və Türkiyə arasındakı münasibətlərin inkişafını gördükdən sonra özlərini buna uyğunlaşdırırlar. Öz daxillərindəki problemləri həll edərək sistemə uyğunlaşmağa çalışırlar. İnşallah, bu coğrafiyada Türkiyə və Azərbaycan başda olmaqla güclü iradə qoyaraq, ən yaxşı formada xalqlarımızın, gənclərimizin rifahı və inkişafı üçün ən yaxşı işləri görəcəyik", - deputat deyib.
Ş.Ayrım Türkiyənin BRİCS-ə qoşulacağı təqdirdə NATO-dan çıxıb-çıxmayacağından da danışıb:
"Türkiyə NATO-nun ən köhnə üzvlərindəndir. NATO daxilində ən güclü orduya malikdir. Türkiyənin NATO-dan çıxması xəyal belə edilə bilməz. Çünki Türkiyə NATO daxilində etibarı olan, illərdir ordusu ilə bu təşkilata dəstək verən ölkədir. Türkiyənin NATO-dan çıxması mümkün deyil. Türkiyə NATO daxilində öz düşüncələrini çox açıq şəkildə ortaya qoyan ölkədir. O baxımdan bunları düşünmək doğru deyil. NATO daxilində olub, o birisi tərəfdə də ola bilər. Niyə olmasın?! Türkiyə sülh tərəfdarı olduğu üçün hər tərəfdə ola bilər".
Xatırladaq ki, BRICS müxtəlif qitələrin dörd dövləti - Braziliya, Rusiya, Hindistan və Çin tərəfindən yaradılıb. 2010-cu ildə Cənubi Afrika assosiasiyaya qoşulub, daha dörd ölkə - BƏƏ, İran, Misir və Efiopiya isə bu ilin əvvəlində təşkilata üzvü. Bundan əlavə, dünyanın 20-dən çox ölkəsi assosiasiyaya üzv olmaq üçün müraciət edib.