Gələcək Azərbaycan Partiyası (GAP) sentyabrın 1-də keçirilən növbədənkənar parlament seçkiləri ilə bağlı bəyanat yayıb.
Modern.az-ın məlumatına görə, bəyanatda bildirilir ki, 1 sentyabr növbədənkənar parlament seçkilərində əhalinin rahat şəkildə və istədiyi namizədə səs verməsinə şərait yaradılmış, onların seçiminə təsir göstərilməyib.
"Gələcək Azərbaycan Partiyasının 1 sentyabr 2024-cü il tarixində ölkəmizdə keçirilən növbədənkənar parlament seçkilərində 24 seçki dairəsi üzrə 1120 müşahidəçi qeydiyyatdan keçmiş və sərbəst müşahidəni təşkil etmişdir.
Partiya müşahidəçilərinin təqdim etdikləri anket məlumatları və beynəlxalq müşahidəçilərin verdikləri rəyləri nəzərə alaraq, VII çağırış Milli Məclisə seçkilərinin nəzarət etdiyimiz seçki dairələrində demokratik mühitdə, azad rəqabət şəraitində keçirildiyi bəyan edirik.
Uğur qazanan namizədlərin hər birini Partiyamız adından təbrik edir və bizi dəstəkləyən seçicilərə öz təşəkkürlərimizi çatdırırıq", - bəyanatda deyilir.