Azərbaycanda bu gün növbədənkənar parlament seçkiləri keçirilir. Seçkilər ölkə ərazisində formalaşdırılmış 125 seçki dairəsinin ərazisində keçirilir. Parlament seçkiləri üçün seçki məntəqələri sentyabrın 1-i səhər saat 8:00-da açılır və səsvermə 19:00-a qədər davam edəcək. Parlament seçkilərində 125 deputat mandatı uğrunda 990 namizəd mübarizə aparır.
Qeyd edək ki, Azərbaycanda seçicilərin ümumi sayı 6 milyon 421 min 960 nəfərdir. Respublika üzrə ümumilikdə 6 min 478 seçki məntəqəsi fəaliyyət göstərir. Onlardan 54-ü işğaldan azad edilmiş ərazilərdə formalaşdırılıb.
Mərkəzi Seçki Komissiyası seçkilərə böyük maraq olduğunu bildirib. Seçkilərdən sonra nə qədər seçicinin səsvermədə iştirak etdiyi və ilkin nəticələr açıqlanacaq.
Modern.az əvvəlki seçkilərdə qeydə alınan seçici fəallığını araşdırıb.
1995-ci ildə Azərbaycanda keçirilən ilk parlament seçkilərində seçici siyahılarına daxil edilmiş 4.1 milyon nəfər vətəndaşdan 86,05 faizi səsvermədə iştirak edib.
5 il sonrakı parlamant seçkilərində isə fəallıq 71,33 faiz idi.
2005-ci ildə baş tutan parlament seçkilərində ilkin olaraq 46.6% seçici fəallığı qeydə alınıb. Lakin sonradan MSK və DSK-lar tərəfindən bir sıra məntəqələrin nəticələri ləğv edildi və seçici fəallığı 42.2%-ə çatdı.
2010-cu ildə isə seçici fəallığı nisbətən artaraq 49.56%-ə çatıb.
Növbəti parlament seçkiləri 2015-ci ildə baş tutub. Bu dəfə seçicilərin yarısından çoxu seçkidə iştirak edib və fəallıq 55.54% olub.
2020-ci ildə keçirilən növbədənkənar parlament seçkilərində isə seçici aktivliyi aşağı düşüb və 46.84% olub.