49 saylı Abşeron ikinci seçki dairəsi üzrə bitərəf namizəd Rizvan Nəbiyev seçicilərə müraciət edib.
Modern.az xəbər verir ki, müraciətdə deyilir:
"Təşviqata başladığımız 9 avqust tarixindən bəri 49 saylı Abşeron ikinci seçki dairəsi üzrə bitərəf namizəd olaraq seçicilərimizdən dəstək almaqdayam. Bu müddət ərzində onların dəstəyi bundan sonra daha da faydalı fəaliyyət göstərməyim üçün mənə əlavə güc verdi.
Görüşlərimizdə ictimaiyyət nümayəndələri, ağsaqqal və ağbirçəklər, ziyalılar, müəllimlər, həkimlər, idmançılar, tələbələr, gənclər və digər təmsilçilər öz dəstəklərini nümayiş etdirirdilər.
Xüsusilə, bu müddət ərzində şəhid ailələri və qazilərimizi evlərində ziyarət etdik. Şəhidlərimizin və qazilərimizin keçdiyi döyüş yolu barədə eşitdiklərim dövlətimizin daha da inkişafı naminə bundan sonra da yorulmadan və əzmlə fəaliyyət göstərməyim üçün mənə əlavə ruh verdi.
Şəhid ailələrinin, qazilərimizin, ağsaqqal və ağbirçəklərimizin təkcə səsinə deyil, həm də xeyir-dualarına ehtiyacım var.
Təşviqat başlayandan bəri sosial şəbəkə üzərində də aktivlik nümayiş etdirdik. İzləyicilərimizdən gələn çoxsaylı bəyənmələr, rəylər və barəmizdə paylaşılan dəstək statusları sosial şəbəkədə də aktiv təşviqat aparmağımız üçün nəticəyönümlü baza rolunu oynadı.
Eyni zamanda, bu dövrdə mətbuatın açıq dəstəyini gördüm. Bir neçə mətbuat orqanında müsahibələrimiz, açıqlamalarımız dərc olundu. Seçicilərlə hər görüşümüz xeyli sayda media subyekti vasitəsilə geniş oxucu kütləsinə çatdırıldı.
Seçicilərə, izləyicilərə və mətbuat nümayəndələrinə dəstəyinə görə dərin minnətdarlığımı bildirirəm!
ƏZİZ SEÇİCİLƏR, HƏR BİRİNİZİN SƏSİ VACİBDİR!
QALİB DÖVLƏTİMİZİN DAHA DA TƏRƏQQİSİ NAMİNƏ BİRGƏ ADDIMLAMAQ ÜÇÜN HƏR BİRİNİZİ SENTYABRIN 1-DƏ MƏNƏ SƏS VERMƏYƏ ÇAĞIRIRAM!"