Ukrayna Silahlı Qüvvələrinin keçmiş baş komandanı Valeri Zalujnının ilk bioqrafiyası çap olunub.
Modern.az BBC-yə istinadən xəbər verir ki, kitab “Dəmir General. İnsanlıq dərsləri” adlanır.
Müəllif keçmiş baş komandanın strateji rabitə üzrə müşaviri olmuş Lyudmila Dolqonovskayadır.
Kitabda qeyd olunub ki, hərbi karyerası əvvəlcədən müəyyən edilmiş Zalujnı bir neçə dəfə, ilk növbədə, maliyyə səbəblərinə görə ordu ilə əlaqəni kəsməyə yaxınlaşıb. Hələ Müdafiə Akademiyasında oxuyarkən qrup yoldaşı Eduard Moskalevlə Kiyev gecə klubunda mühafizəçi işləməli olub.
Ukrayna Silahlı Qüvvələrinin baş komandanı təyin olunması Zalujnı üçün tamamilə sürpriz olub. Dolqonovskaya yazır ki, Rusiya işğalı ərəfəsində Zalujnı bütün Ukraynada hərbi vəziyyətin tətbiq edilməsində və ümumi səfərbərlik elan edilməsində israr edib, lakin prezident Zelenski buna razı olmayıb.
Zalujnı hesab edir ki, Ukrayna Silahlı Qüvvələrinin 1991-ci il sərhədlərinə daxil olması Ukraynanı davamlı sülhlə təmin etməyəcək. Onun fikrincə, yalnız NATO-ya üzvlük və ya dövlətin İsrail modeli əsasında qalaya çevrilməsi ölkəni etibarlı şəkildə qoruya bilər.
Keçmiş baş komandan Rusiya hərbi elmlər məktəbinə hörmətlə yanaşır. Lakin böyük müharibə başlayandan sonra Zalujnı belə qənaətə gəlib ki, Rusiya ordusundakı real vəziyyət hərbi elmdən tamamilə ayrılıb.
Kitabda Zalujnının həyat və peşə yolunun təqdimatı 2023-cü il martın 1-də - müəllif onun köməkçisi vəzifəsini tərk edəndə başa çatır.