2019-2024-cü illərdə Türkiyənin Cümhuriyyət Xalq Partiyasından (CHP) İzmir Böyükşəhər Bələdiyyəsinin sədri olmuş siyasətçi Tunç Soyer partiyanın sentyabrda keçiriləcək qurultayında sədrliyə namizəd olacaq.
Modern.az xəbər verir ki, sabiq İzmir meri bu barədə jurnalist Barış Yarkadaşa müsahibəsində məlumat verib.
O, CHP sədrliyinə namizəd olacağı barədə yayılan məlumatları təsdiqləyib: "Bu ölkənin aydın gələcəyinə inanmış və bunun üçün heç durmadan çalışmış bir insan olaraq mübarizəyə davam edəcəyəm. Əlbəttə ki, sədrlik də bu mübarizənin aparılacağı ən önəmli vəzifələrdən biridir və mən dilimə gətirməzdən əvvəl bu vəzifəyə layiq görülmək böyük qürurdur. Bu prosesdə harada ehyitac varsa, orada olacağam. Həyatı yaxşılaşdırma sənəti olaraq gördüyüm siyasəti bədəli nə olursa, olsun, son nəfəsimə qədər davam etdirəcəyəm və bu inancı paylaşanlarla birlikdə çalışmağa davam edəcəyəm".
Tunç Soyer keçmiş CHP sədri Kemal Kılıçdaroğlu ilə görüşünə də toxunub: "Çox məhsuldar söhbət oldu, partiyadan çox Türkiyəni müzakirə etdik".
Qeyd edək ki, Tunç Soyer 4-5 noyabr 2023-cü ildə keçirilmiş CHP qurultayında Kemal Kılıçdaroğlunun sədrliyə namizədliyini dəstəklədiyi üçün Özgür Özelin seçilməsindən sonra yeni rəhbərlik tərəfindən 31 mart 2024-cü il tarixli yerli seçkilərdə İzmir merliyinə yenidən namizəd göstərilməyib.
1959-cu ildə anadan olan Tunç Soyer ixtisasca hüquqşünasdır. O, tarixən "CHP-nin qalası" adlandırılan İzmirdə 2019-cu ildə bələdiyyə sədri seçilib. Bundan əvvəl Soyer İzmirin Seferihisar rayon bələdiyyəsinə də 10 il (2009-2019) sədrlik edib. Sol təmayüllü siyasətçi olan merin babası Türkiyənin Egey bölgəsinə Balkanlardan - Kosovanın Priştina şəhərindən köç edib.
Ankara Universitetinin hüquq fakültəsinin məzunu olan Soyer daha sonra İsveçrənin Vebster Universitetində beynəlxalq münasibətlər, İzmirdəki Dokuz Eylül Universitetində isə Avropa İttifaqı araşdırmaları üzrə təhsilini davam etdirib. İngilis və fransız dillərini bilən bələdiyyə sədri 2 qız atasıdır. O, 2019-cu ildəki bələdiyyə seçkilərində 58 faiz səs toplayaraq İzmir meri seçilib. Buna baxmayaraq 2024-cü ildə partiya tərəfindən namizəd göstərilməyib.
Xatırladaq ki, CHP sədri Özgür Özelin sədrliyi ilə avqustun 4-də toplanan Partiya Məclisində 6-9 sentyabr tarixlərində növbədənkənar qurultay keçirilməsinə qərar verilib.