ABŞ Kiyevi uzaqmənzilli raketlərlə təmin etməyə hazırdır.
Modern.az xəbər verir ki, bu barədə "Politico" yazıb.
Nəşr anonim qalmaq istəyən mənbəyə istinadən yazıb ki, prezident Co Baydenin administrasiyası Ukraynanı uzun mənzilli JASSM qanadlı raketləri ilə təmin etməyə hazırdır. Nəşrin həmsöhbəti bildirib ki, Ukraynaya raketlərin göndərilməsi ilə bağlı yekun qərar verilməyib, lakin Ağ Ev hazırda bu məsələ ilə bağlı “mürəkkəb detallar” üzərində işləyir. Konkret olaraq, söhbət həssas texnologiyaların ötürülməsi ilə bağlı yoxlamadan və Ukrayna təyyarəsinin 1088 kq ağırlığında, 454 kq döyüş başlığı daşıyan raketi buraxma ehtimalından gedir.
JASSM raketləri F-16 döyüş təyyarələrindən buraxıla bilər. Nəşr aydınlaşdırır ki, ilk dəfə 2000-ci illərin əvvəllərində istifadəyə verilmiş bu raket ABŞ tərəfindən döyüş əməliyyatlarında olduqca nadir hallarda istifadə edilib və yalnız Vaşinqtonun bir neçə müttəfiqinə verilib. Məlumata görə, Polşa, Avstraliya və Finlandiya artıq bu silahlara malikdir və Yaponiya ilə Niderland iyulda raketlərin alınması ilə bağlı müqavilələr imzalayıblar, çatdırılması yaxın illərdə gözlənilir. Almaniya, Yunanıstan, Rumıniya və Danimarka da JASSM raketlərinin alınması ilə bağlı danışıqlar aparır.
Ukraynada artıq ABŞ, Böyük Britaniya və Fransa tərəfindən verilən havadan və yerdən buraxılan raketlər var ki, bu raketlər buraxılış nöqtəsindən 300 km məsafədəki hədəflərə çata bilir, lakin bu raketlərin Rusiya ərazisində istifadəsinə dair məhdudiyyətlər qüvvədə qalır.