ABŞ prezidenti Co Bayden mübadilə çərçivəsində sərbəst buraxılan rusiyalı müxalif fəal Vladimir Kara-Murzanı qəbul edib.
Modern.az DPA-ya istinadən xəbər verir ki, avqustun 1-də məhbus mübadiləsi çərçivəsində azad edilən rusiyalı müxalif siyasətçi və publisist ailəsi ilə birlikdə Ağ Evdə ABŞ prezidenti Co Baydenlə görüşüb.
42 yaşlı Rusiya vətəndaşı Vladimir Kara-Murzanın Britaniya vətəndaşlığı da var. Bundan əlavə, Kara-Murzanın ABŞ-da daimi yaşamaq hüququ verən “greencard”ı var. Azadlığa çıxandan dərhal sonra siyasətçi Almaniyaya aparılıb və orada onu və digər keçmiş siyasi məhbusları Köln/Bonn hava limanında Almaniya kansleri Olaf Şolts qarşılayıb.
"Deutsche Welle" ofisində jurnalistlərlə görüşündə Kara-Murza Rusiyadan Türkiyəyə uçan təyyarədə siyasi məhbusları müşayiət edən FTX zabitinin ifadəsini xatırladıb: “Dedi ki, baxın, baxın, öz vətəninizi sonuncu dəfə görürsünüz. Mən isə ona dedim ki, təhsil üzrə tarixçiyəm, nəinki inanıram və düşünürəm, əminəm ki, mən və hamımız mütləq Rusiyaya qayıdacağıq və Rusiyanın azad, normal, sivil Avropa ölkəsi olacağı gün gələcək”, - deyə müxalifətçi bildirib.