Bakı. Trend:

Ələt Azad İqtisadi Zonasında (ƏAİZ) fəaliyyət göstərən bütün müəssisələr yüksək əlavə dəyər yaradan məhsul istehsalına və ixrac fəaliyyətinə yönəlməlidir.

Bu barədə Ələt Azad İqtisadi Zonasının İdarə Heyətinin sədri Valeh Ələsgərov İslam İnkişaf Bankı Qrupunun Özəl Sektor üzrə 14-cü Forumunda çıxışı zamanı bildirib.

Onun sözlərinə görə, zonada fəaliyyət göstərən müəssisələr istehsal etdikləri məhsulların ən azı 75 faizini Azərbaycanın hüdudlarından kənara ixrac etməlidirlər. Bu siyasət rezidentlər ilə daxili bazarda fəaliyyət göstərən şirkətlər arasında qeyri-sağlam rəqabətin qarşısını almağa xidmət edir.

Valeh Ələsgərov qeyd edib ki, Ələt Azad İqtisadi Zonasının uğuru onun regionda və daha geniş coğrafiyada yerləşən digər azad iqtisadi zonalarla müqayisədə rəqabətqabiliyyətli olmasından asılıdır.

Onun sözlərinə görə, zonanın cəlbediciliyini artırmaq üçün o, qonşu ölkələrdəki analoji platformalardan daha üstün olmalıdır. İdarə Heyətinin sədri vurğulayıb ki, Ələt XİZ-in əsas üstünlüklərindən biri onun strateji yerləşməsidir. Zona Bakı Beynəlxalq Dəniz Ticarət Limanının yaxınlığında, Şərq-Qərb və Şimal-Cənub beynəlxalq nəqliyyat dəhlizlərinin kəsişməsində yerləşir ki, bu da rezidentlərə geniş nəqliyyat-logistika xidmətlərinə çıxış imkanı yaradır.

Valeh Ələsgərov bildirib ki, “Silk Way Airlines” yükdaşıma şirkətinin iştirakı ilə ƏAİZ ərazisində yük hava limanının tikintisinə başlanılıb. Obyektin gələn il istifadəyə verilməsi gözlənilir.

“Yük hava limanının tikilməsində əsas məqsəd zonada fəaliyyət göstərən şirkətlərə əlavə logistika xidmətləri təqdim etməkdir”, – deyə o qeyd edib.

Onun sözlərinə görə, hava yük infrastrukturu yüksək texnologiyalı şirkətlərin cəlb edilməsi üçün vacib şərtlərdən biridir. Zona rezidentlərinə əvvəlcədən hazırlanmış infrastruktur və kommunal xidmətlərlə təmin olunan sənaye təyinatlı torpaq sahələri təqdim edilir.

Valeh Ələsgərov əlavə edib ki, zonada korporativ vergilər və gömrük rüsumları üzrə sıfır dərəcə də daxil olmaqla vergi və gömrük güzəştləri tətbiq olunur.

Sədr vurğulayıb ki, Ələt Azad İqtisadi Zonasının əsas üstünlüklərindən biri də onun qanunvericilik bazası və tənzimləyici mühitidir.