Bakı. Trend:

Fransa ABŞ-nin "Palantir" şirkətinin istehsalı olan "Maven" platformasına alternativ olaraq özünün süni intellektlə işləyən döyüş planlaşdırma sistemini hazırlayır.

Trend-in məlumatına görə, bu barədə "Les Echos" qəzeti Fransa Quru Qoşunlarının Baş Qərargah rəisinin müavini general Patrik Yustelə istinadən xəbər verib.

""Maven" hətta amerikalılar tərəfindən də yekdilliklə qəbul edilmir. Biz alternativ hazırlayırıq və bir çox avropalı tərəfdaşlarımız bununla maraqlanır", - deyə general bildirib.

O əlavə edib ki, Amerika sistemi "test rejimində" istifadə olunur.

Nəşr qeyd edib ki, bir neçə aydır ki, Fransa ordusu Napoleonun qərargah rəisi general Lui-Aleksandr Bertyenin (1753-1815) adını daşıyan yeni böyük dil modeli olan "Berthier" əsasında yaradılan öz "Arcadia" sistemini inkişaf etdirir. Bu sistem döyüş meydanından məlumatları toplamaq və silah seçimi, qoşunların təşkili və yerləşdirmə seçimlərini tövsiyə etməklə yanaşı, qərarları əlaqələndirmək üçün müxtəlif komandanlıq səviyyələri arasında söhbətləri birləşdirmək üçün hazırlanmışdır.