Bakı. Trend:

Yeni Şəhər Gündəliyinin uğurlu icrası yalnız siyasət məsələsi deyil, həm də etimadın möhkəmləndirilməsi, demokratik idarəetmənin inkişafı və çoxtərəfli əməkdaşlığın gücləndirilməsi ilə bağlıdır.

Trend xəbər verir ki, bunu Qambiyanın Banjul şəhərinin meri və REFELA Africa təşkilatının prezidenti Rohey Malik Lou Bakıda keçirilən BMT-nin Ümumdünya Şəhərsalma Forumunun 13-cü sessiyasının (WUF13) bağlanış mərasimində deyib.

Onun sözlərinə görə, qlobal ictimaiyyət bu gün şəhərlərin və icmaların gələcəyinin birgə fəaliyyət və əməkdaşlıqdan asılı olduğunu daha aydın şəkildə dərk edir.

Rohey Malik Lou qeyd edib ki, Polşa və Malavinin rəhbərliyi ilə Yeni Şəhər Gündəliyinin nəzərdən keçirilməsi və qiymətləndirilməsi istiqamətində aparılan məsləhətləşmələr mühüm əhəmiyyət daşıyır.

“Biz bu proseslərə göstərilən davamlı dəstəyi alqışlayır və qlobal təşəbbüslərə konstruktiv töhfə verməyə hazır olduğumuzu bildiririk. Çünki burada söhbət təkcə siyasətdən getmir. Bu, etimadın qurulması, demokratik idarəetmənin möhkəmləndirilməsi və XXI əsrdə çoxtərəfli əməkdaşlığın inkişafı məsələsidir”, – deyə o vurğulayıb.

Çıxışının sonunda Rohey Malik Lou yerli və regional hakimiyyət orqanları adından forumun təşkilatçılarına və iştirakçılarına təşəkkür edib.

“Bir daha yerli və regional hakimiyyət orqanları adından hər kəsə təşəkkür edir, bütün iştirakçılara təhlükəsiz yol və uğurlu dönüş arzulayıram”, – deyə o əlavə edib.