Bakı.Trend:

Dörd yeni ölkə və dənizaşırı ərazinin qoşulmasından sonra Qlobal Cənub Gənclər Platformasının iştirakçılarının sayı 20-yə çatıb.

Trend xəbər verir ki, bu barədə Bakı Təşəbbüs Qrupunun icraçı direktoru Abbas Abbasov Ümumdünya Şəhərsalma Forumunun 13-cü sessiyası (WUF13) çərçivəsində keçirilən “Dekolonizasiya prosesində gənclərin şəhərsalmada oynadığı rol” adlı beynəlxalq konfransın yekun iclasında bildirib.

Onun sözlərinə görə, platformanın yeni iştirakçıları Bonaire, Sent-Marten, Seneqal və Misir olub.

“Bu günə olan məlumata görə, Qlobal Cənub Gənclər Platformasına dörd yeni dövlət və dənizaşırı ərazi qoşulub və bununla da iştirakçıların ümumi sayı 20-yə yüksəlib”, – deyə o bildirib.

Abbas Abbasov qeyd edib ki, platforma daha geniş beynəlxalq iştirak və əməkdaşlıq hesabına genişlənməyə davam edəcək.

Onun sözlərinə görə, platforma iştirakçı ölkələrin və dənizaşırı ərazilərin maraq, prioritet və gözləntilərini əks etdirən dayanıqlı tərəfdaşlıqların qurulmasının və praktiki təşəbbüslərin həyata keçirilməsinin vacibliyini təsdiqləyir.

İcraçı direktor qeyd edib ki, platformanın ilk rəsmi iclası zamanı iştirakçılar əsas prioritetləri müəyyənləşdirib və təşkilatın fəaliyyətinin inkişafı üzrə növbəti addımları planlaşdırıblar.

Müzakirələr həmçinin iştirakçı ölkələrin gəncləri arasında əməkdaşlıq mexanizmlərinin gücləndirilməsi və institusionallaşdırılması məsələlərinə yönəlib.

Abbasov əlavə edib ki, platformanın qarşıdakı mərhələsinin əsas prioritetlərindən biri beynəlxalq təşkilatlar, çoxtərəfli institutlar və vətəndaş cəmiyyəti strukturları ilə əməkdaşlığın inkişaf etdirilməsi olacaq.

Onun sözlərinə görə, bu, platformanın beynəlxalq səviyyədə tanınmasını artıracaq, gənclərin qlobal qərarvermə proseslərində iştirakını genişləndirəcək, həmçinin birgə təşəbbüs və layihələrin həyata keçirilməsinə töhfə verəcək.

Qeyd edək ki, bu gün Bakıda Ümumdünya Şəhərsalma Forumunun 13-cü sessiyasının (WUF13) dördüncü günü keçirilir. BMT-nin Məskunlaşma Proqramı (UN-Habitat) və Azərbaycan hökumətinin birgə təşkilatçılığı ilə keçirilən forumun bugünkü proqramı urbanizasiya, iqlim dəyişiklikləri, inklüziv şəhər inkişafı, mənzil siyasəti və dayanıqlı idarəetmə mövzularına həsr olunub.Dördüncü gün çərçivəsində “Qeyri-rəsmi yaşayış məntəqələrinin və gecəqonduların transformasiyası”, “İqlim və mənzil əlaqəsi”, “Şəhərlərdən səslər: SPECA Şəhərlər Forumu”, “Azərbaycanın mənzil təcrübəsi”, “Şəhərlər oyun meydanı kimi”, “Mədəni irsin yenidən düşünülməsi və inklüziv şəhər regenerasiyası”, “Təmiz hava”, “Əlilliyi olan şəxslər”, “Parlamentarilər”, “Tullantıların idarə olunmasının dairəvi iqtisadiyyata uyğun inkişafı” və “Şəhər iqlim irsinin inkişafı” mövzularında dialoqlar, xüsusi sessiyalar və dəyirmi masalar keçiriləcək.

Forum iştirakçıları urbanizasiya proseslərinin sosial inklüzivlik, yaşıl iqtisadiyyat və iqlim dayanıqlılığı prinsipləri əsasında inkişaf etdirilməsinin vacibliyini qeyd ediləcək. Sessiyalarda həmçinin şəhərlərin gələcək inkişafında innovativ həllər, təmiz enerji, dayanıqlı nəqliyyat və rəqəmsal texnologiyaların rolu geniş müzakirə olunacaq.WUF13-ün üçüncü günü də geniş tədbirlər proqramı ilə yadda qalıb. Həmin gün qlobal mənzil böhranı, təhlükəsiz və inklüziv şəhərlərin formalaşdırılması, iqlim dayanıqlılığı, süni intellekt və şəhər idarəçiliyi, yaşıl urbanizasiya, sosial bərabərlik və dayanıqlı nəqliyyat kimi mövzular ətrafında müzakirələr aparılıb.

Üçüncü gün çərçivəsində xüsusi diqqət çəkən hadisələrdən biri Azərbaycanın Şuşa şəhəri ilə Türkiyənin Trabzon şəhəri arasında qardaşlaşma haqqında memorandumun imzalanması olub.Sənədi Azərbaycan Respublikası Prezidentinin Şuşa rayonunda xüsusi nümayəndəsi Aydın Kərimov və Ahmet Metin Genç imzalayıblar.Memorandum iki şəhər arasında şəhərsalma, mədəniyyət, turizm və yerli idarəetmə sahələrində əməkdaşlığın genişləndirilməsini nəzərdə tutur.

Forumun ilk iki günü də yüksək səviyyəli tədbirlər və müzakirələrlə müşayiət olunub.İlk gün Yeni Şəhər Gündəliyinə həsr olunmuş nazirlər toplantısı, nazirlərin dəyirmi masası, qadınlar və vətəndaş cəmiyyəti assambleyaları, biznes sessiyaları və şəhər rifahı ilə bağlı müzakirələr keçirilib. Eyni zamanda, BMT və Azərbaycan bayraqlarının qaldırılması mərasimi təşkil olunub.İkinci gün isə ilk dəfə təşkil edilən Liderlər Sammiti ilə diqqət çəkib. Həmin gün qlobal mənzil böhranı, urbanizasiya siyasəti və şəhər dayanıqlılığı ilə bağlı yüksək səviyyəli müzakirələr aparılıb. WUF13 çərçivəsində Mexiko şəhərinin pavilyonunun açılışı da baş tutub və bu platforma Latın Amerikası regionu ilə əməkdaşlığın genişləndirilməsi və WUF14-ə hazırlıq baxımından mühüm addım kimi qiymətləndirilib.

182 ölkədən 40 mindən artıq iştirakçının qeydiyyatdan keçdiyi WUF13 mayın 22-dək davam edəcək. “Hamı üçün mənzil: təhlükəsiz və dayanıqlı şəhərlər və yaşayış məntəqələri” mövzusuna həsr olunmuş forum hökumətləri, beynəlxalq təşkilatları, ekspertləri və vətəndaş cəmiyyəti nümayəndələrini bir araya gətirərək dayanıqlı şəhər inkişafı sahəsində qlobal əməkdaşlığın gücləndirilməsinə xidmət edir.